ਟੀਮ ਇੰਡੀਆ ਦੇ ਜ਼ਿੰਬਾਬਵੇ ਦੌਰੇ ਦਾ ਐਲਾਨ: ਜੁਲਾਈ 'ਚ ਖੇਡੀ ਜਾਵੇਗੀ T20 ਸੀਰੀਜ਼, ਨਵੇਂ ਚਿਹਰਿਆਂ ਨੂੰ ਮਿਲੇਗਾ ਮੌਕਾ

ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (BCCI) ਨੇ ਭਾਰਤੀ ਟੀਮ ਦੇ ਇੱਕ ਹੋਰ ਅਹਿਮ ਦੌਰੇ ਦਾ ਸ਼ਡਿਊਲ ਜਾਰੀ ਕਰ ਦਿੱਤਾ ਹੈ। ਟੀਮ ਇੰਡੀਆ ਜੁਲਾਈ ਮਹੀਨੇ ਵਿੱਚ ਜ਼ਿੰਬਾਬਵੇ ਦਾ ਦੌਰਾ ਕਰੇਗੀ, ਜਿੱਥੇ ਦੋਵਾਂ ਦੇਸ਼ਾਂ ਵਿਚਾਲੇ ਤਿੰਨ ਮੈਚਾਂ ਦੀ T20 ਇੰਟਰਨੈਸ਼ਨਲ ਸੀਰੀਜ਼ ਖੇਡੀ ਜਾਵੇਗੀ। ਇਸ ਸੀਰੀਜ਼ ਵਿੱਚ ਭਾਰਤ ਦੇ ਸੀਨੀਅਰ ਖਿਡਾਰੀਆਂ ਨੂੰ ਆਰਾਮ ਦਿੱਤਾ ਜਾ ਸਕਦਾ ਹੈ ਅਤੇ ਆਈਪੀਐਲ (IPL) ਵਿੱਚ ਚੰਗਾ ਪ੍ਰਦਰਸ਼ਨ ਕਰਨ ਵਾਲੇ ਨੌਜਵਾਨ ਖਿਡਾਰੀਆਂ ਨੂੰ ਅਜ਼ਮਾਇਆ ਜਾਵੇਗਾ।

ਸੀਰੀਜ਼ ਦਾ ਸ਼ਡਿਊਲ ਅਤੇ ਵੇਨਿਊ

ਬੀਸੀਸੀਆਈ ਅਨੁਸਾਰ ਇਸ ਸੀਰੀਜ਼ ਦੇ ਤਿੰਨੋਂ ਮੁਕਾਬਲੇ ਇੱਕੋ ਮੈਦਾਨ 'ਤੇ ਖੇਡੇ ਜਾਣਗੇ, ਜਿਸ ਕਾਰਨ ਟੀਮ ਨੂੰ ਵਾਰ-ਵਾਰ ਸਫਰ ਨਹੀਂ ਕਰਨਾ ਪਵੇਗਾ।

ਪਹਿਲਾ T20: 23 ਜੁਲਾਈ

ਦੂਜਾ T20: 25 ਜੁਲਾਈ

ਤੀਜਾ T20: 26 ਜੁਲਾਈ

ਸਥਾਨ: ਹਰਾਰੇ ਸਪੋਰਟਸ ਸਟੇਡੀਅਮ, ਹਰਾਰੇ।

ਇਸ ਸਾਲ ਕੋਈ ਵੱਡਾ T20 ਟੂਰਨਾਮੈਂਟ ਨਾ ਹੋਣ ਕਾਰਨ ਸੰਭਾਵਨਾ ਹੈ ਕਿ ਸੂਰਿਆਕੁਮਾਰ ਯਾਦਵ ਵਰਗੇ ਸੀਨੀਅਰ ਖਿਡਾਰੀ ਇਸ ਦੌਰੇ 'ਤੇ ਨਹੀਂ ਜਾਣਗੇ। ਉਨ੍ਹਾਂ ਦੀ ਜਗ੍ਹਾ ਕਿਸੇ ਨਵੇਂ ਖਿਡਾਰੀ ਨੂੰ ਕਪਤਾਨੀ ਸੌਂਪੀ ਜਾ ਸਕਦੀ ਹੈ। ਬੋਰਡ ਦਾ ਮੁੱਖ ਮਕਸਦ ਨਵੇਂ ਟੈਲੇਂਟ ਨੂੰ ਕੌਮਾਂਤਰੀ ਪੱਧਰ 'ਤੇ ਪਰਖਣਾ ਹੈ।

ਸਾਲ 2027 ਵਿੱਚ ਵਨਡੇ ਵਿਸ਼ਵ ਕੱਪ ਹੋਣਾ ਹੈ, ਜਿਸ ਦੀ ਮੇਜ਼ਬਾਨੀ ਦੱਖਣੀ ਅਫਰੀਕਾ, ਜ਼ਿੰਬਾਬਵੇ ਅਤੇ ਨਾਮੀਬੀਆ ਸਾਂਝੇ ਤੌਰ 'ਤੇ ਕਰਨਗੇ। ਇਸੇ ਦੀ ਤਿਆਰੀ ਵਜੋਂ ਭਾਰਤੀ ਟੀਮ ਅਗਲੇ ਸਾਲ ਜਨਵਰੀ ਵਿੱਚ ਜ਼ਿੰਬਾਬਵੇ ਨਾਲ ਵਨਡੇ ਸੀਰੀਜ਼ ਵੀ ਖੇਡੇਗੀ, ਜੋ ਕਿ ਭਾਰਤ ਵਿੱਚ ਹੀ ਹੋਵੇਗੀ। ਹੁਣ ਬੀਸੀਸੀਆਈ ਦਾ ਪੂਰਾ ਫੋਕਸ ਟੀ-20 ਦੀ ਬਜਾਏ ਵਨਡੇ ਫਾਰਮੈਟ 'ਤੇ ਰਹੇਗਾ।

ਹਾਲ ਹੀ ਵਿੱਚ ਭਾਰਤ ਨੇ ਸੂਰਿਆਕੁਮਾਰ ਯਾਦਵ ਦੀ ਅਗਵਾਈ ਵਿੱਚ T20 ਵਿਸ਼ਵ ਕੱਪ ਜਿੱਤਿਆ ਸੀ। ਹੁਣ ਅਗਲਾ T20 ਵਿਸ਼ਵ ਕੱਪ 2028 ਵਿੱਚ ਹੋਵੇਗਾ। ਬੋਰਡ ਚਾਹੁੰਦਾ ਹੈ ਕਿ ਉਦੋਂ ਤੱਕ ਇੱਕ ਨਵੀਂ ਅਤੇ ਮਜ਼ਬੂਤ ਟੀਮ ਤਿਆਰ ਕੀਤੀ ਜਾਵੇ, ਇਸੇ ਲਈ ਹੁਣ ਤੋਂ ਹੀ ਨੌਜਵਾਨਾਂ ਨੂੰ ਲਗਾਤਾਰ ਮੌਕੇ ਦਿੱਤੇ ਜਾ ਰਹੇ ਹਨ।